La Associazion 1511 su La Patrie dal Friûl

La Associazion 1511 e à cjatât spazi ancje sul numar di Setembar dal mensîl La Patrie dal Friûl intun articul firmât di Matieu Fogale che nus fâs plasê di ripuartâ ancje sul nestri sît.

E nas la Associazion 1511 par memoreâ i 500 agns dal riviel de Joibe Grasse

UNE GNOVE ASSOCIAZION INTE REALTÂT FURLANE_ Ai 9 di Lui, li de sede de regjon a Udin, e je stade presentade la Associazion 1511, une gnove realtât che si è dade dongje cul fin di celebrâ intal mût miôr i 500 agns dal riviel de Joibe Grasse 1511 che a colin propit intal 2011.  Pai fondadôrs de associazion l’aniversari de Joibe Grasse dal 1511 nol pues che jessi l’apontament centrâl dal 2011. Un apontament che nol à di esaurîsi in pôcs dîs ma che al merte di jessi svilupât intune schirie di iniziativis vie par dut l’an. L’obietîf de Associazion di fat nol è dome chel di ricuardâ un episodi, ancje se impuartant, dal passât, ma chel di judâ une riflession sul procès di autocussience dal popul furlan, tacant des bataiis pai siei dirits e pal autoguvier dal teritori.

I PROGJETS PAL ANIVERSARI DAL 2011_Intant dal incuintri dai 9 di Lui la associazion e à presentât une part dai siei progjets par chest aniversari. La prime iniziative nassude de colaborazion fra la associazion e lis altris realtâts za ativis sul teritori furlan e je rapresentade de gnove sezion dal Premi Friûl, la storiche manifestazion organizade ogni an di Radio Onde Furlane. Dongje de sezion dedicade ae musiche, di fat, la edizion 2010 e proponarà ancje une sezion dedicade ai fumuts, che in cheste ocasion e varà tant che tematiche centrâl propit il riviel popolâr dal 1511. I progjets elaborâts, dut câs, a son cetancj. Par esempli la Associazion e je daûr a pensâ a une mostre dedicade ai riviei popolârs, ancje fûr dai confins furlans, che e sedi siore di testemoneancis origjinâls e al svilup di percors turistics relatîfs ae ricorence. No ultime e va ricuardade la domande fate aes aministrazions locâls di dedicâ viis o placis ae Joibe Grasse dal 1511.

COLABORAZION E SINERGJIIS PAR ORGANIZÂ LA RICORENCE_ La Associazion 1511 e met dongje un grup di personis che a son za impegnadis in altris realtâts associativis che a àn tant che obietîf la difese dal Friûl e de so identitât, come il Comitât 482, il Comitât pe vite dal Friûl rurâl e v.i.. Cheste gnove realtât e je pronte a dâ bon acet a dutis lis personis che a’nd condividin lis finalitâts e a vuelin colaborâ par dâi il just ricognossiment al riviel de Joibe Grasse, ma e cirarà cu la stesse determinazion di contrastâ ogni tentatîf di leture reazionarie di chest episodi storic. Tentatîf che, pai rapresentants de associazion, si è za fat in passât. La storie dal riviel di fat e je stade dispès taponade par fâ puest ai stereotips dal furlan salt, onest e lavoradôr o dal furlan eterni sotan. Par chest la Associazion 1511 e crôt che chest aniversari al sedi la ocasion miôr par riscuvierzi cheste par de storie dai furlans, par svilupâ il so valôr identitari e par fâ deventâ cheste ricorence un fîl ros che al unìs i furlans di îr a chei di vuê e di doman.