"1511 il Friûl de Joibe Grasse" a Cjampfuarmit

Joibe ai 21 di Avrîl, alì de ostarie "A la Patrie dal Friûl" a Cjampfuarmit (te place là che al è ancje il palaç dal Comun), a vot e mieze di sere (20.30), si davuelzarà une gnove presentazion di "1511 il Friûl de Joibe Grasse": la publicazion de cooperative Serling che e met adun la mape creade di Luigino Peressini e i tescj scrits di Carli Pup par contâ la storie dal plui grant riviel popolâr furlan.

Inte suaze carateristiche e ospitâl de ostarie, i doi autôrs a proponaran un viaç intal Friûl dal 1511 framieç dal cressi des tensions sociâls, de faide jenfri Strumîrs e Çamberlans, de vuere tra Vignesie e l'Imperi, dai savoltaments dal Carnavâl, par rivâ po al sclop, al svilup e ae fin dal riviel, ma ancje ae ereditât che al à lassât ai furlans.

Une gnove ocasion par cognossi miôr la storie dal Friûl e par recuperâ un toc impuartant de nestre memorie di popul.

"Fûcs su lis culinis" ai 9 di Avrîl a Vildivar

Dopo de serade de setemane stade a Murùs, la Associazion 1511 e propon “Fûcs su lis culinis. Storiis di riviel tal Friûl culinâr” ancje a Vildivar. L'apontament al è sabide ai 9 di Avrîl a vot e mieze di sere (20.30) alì de sale dal Consei comunâl di Vildivar.

La iniziative - che e diven de colaborazion tra il Comun di Vildivar, la Associazion 1511, la Serling, la Associazion “El Tomât” e il grup “Vididule Project” - e propon un aprofondiment a cjaval tra storie, croniche, leterature e musiche su trê rivoltis furlanis: chê de Joibe Grasse dal 1511; chê dal 1841 a S. Denêl cuintri de privatizazion des comugnis; e chê di Sarsêt dal 1867 cuintri de “vuardie nazionâl”.

Intant de serade, i atôrs Daniela Zorzini e Daniele Copetti a proponaran la leture seniche di tocs gjavâts fûr sei di cronichis di chei agns, sei di oparis leterariis scritis di Alviero Negro e Riedo Puppo. Carli Pup invezit al proponarà la ricostruzion storiche dai trê episodis. I musiciscj dal “Vididule Project” a compagnaran leturis e intervents storics cuntun repertori di musichis tradizionâls e tocs componûts di pueste pe ocasion.

Il riviel de Joibe Grasse cjantât par furlan

Il panorame musicâl furlan nol pâr che al vedi cjatât intal riviel dal 1511 une font impuartante di ispirazion, ma no mancjin lis ecezions. Intant de edizion dal 2010 dal Premi Friûl, il grup "Ad Plenitatem Lunae" al à presentât un toc su la Joibe Grasse che al propon cumò intai siei concierts ator pal Friûl. Dopo di une lungje spiete, ancje i "Dlh Posse" a àn metût fûr un toc che si riclame al 1511. Il toc al jere za stât scrit agns indaûr, ma al è jessût dome cumò sul lôr sît (di dulà che si pues discjariâlu a gratis) e su Youtube a disposizion di ducj chei che a àn voie di scoltâlu. Sante scugne, duncje, proponilu ancje chi...