30/03/11

Ai 2 di Avrîl "Fûcs su lis culinis" a Murùs

A van indenant lis iniziativis che la Associazion 1511 e je daûr a svilupâ ator pal Friûl pai cinccent agns dal riviel de Joibe Grasse. Sabide ai 2 di Avrîl a vot e mieze di sere (20.30) si varà un gnûf apontament a Murùs, simpri alì dal Auditorium comunâl “Riedo Puppo”.
Si trate de anteprime di “Fûcs su lis culinis. Storiis di riviel tal Friûl culinâr”. Chest colp, di fat, no si fevele dome de Joibe Grasse dal 1511, ma ancje di altris dôs rivoltis furlanis: chê dal 1841 a S. Denêl cuintri de privatizazion des comugnis; e chê di Sarsêt dal 1867 cuintri de “vuardie nazionâl”. La serade e devente duncje la ocasion par tornâ a scuvierzi trê moments dismenteâts o pôc cognossûts de nestre storie.
Dilunc vie de serade i atôrs Daniela Zorzini e Daniele Copetti a proponaran la leture seniche di tocs gjavâts fûr sei di cronichis e documents di chei agns, sei di oparis leterariis scritis di Alviero Negro e Riedo Puppo e dedicadis propite a chei episodis. La ricostruzion storiche des trê rivoltis invezit e sarà curade di Carli Pup. A compagnâ leturis e intervents storics a saran i musiciscj dal “Vididule Project” cuntun repertori di musichis tradizionâls e tocs componûts di pueste pe ocasion.
Daûr de iniziative, in plui de Associazion 1511, a son il Comun di Murùs, la Serling, la associazion “El Tomât” e il grup musicâl “Vididule Project”.

23/03/11

"La Patrie dal Friûl" e torne sul 1511

Il riviel de Joibe Grasse dal 1511 al torne ancje sul numar di Març dal mensîl "La Patrie dal Friûl". Passât l'inovâl dai 500 agns dal sclop de rivolte, lis ocasion par tornâ parsore dal argoment no mancjin. Cun di fat, si fevele di "1511 Il Friûl de Joibe Grasse" (il librut cu la mape di Luigino Peressini publicât de Serling), ma ancje dal ultin numar dal gjornalut par fruts "Alc&cè" che al fronte chest teme, e dal blog de nestre associazion. Dongje di chestis trê segnalazions, dut câs, si presente ancje un piçul ritrat di Michael Gaismair, comandant militâr e ideolic de rivolte contadine tirolese dal 1525. Un personaç che o varìn ocasion di tornâi parsore.

21/03/11

Miercus serade su la Joibe Grasse a Codroip

Al sarà il riviel de Joibe Grasse dal 1511 a vierzi la seste edizion di "C'era una volta...", la manifestazion metude adun de SOMSI cul Comun di Codroip. L'apontament al è miercus ai 23 di Març, a nûf mancul un cuart di sere (20.45), alì de sale conferencis de biblioteche civiche di Codroip. La serade e previôt une conference sul teme svilupade dal president de Associazion 1511, Carli Pup. 
A van duncje indenant i apontaments sul teritori proponûts de associazion par fâ cognossi plui a fonts resons, dinamichis e protagoniscj de plui grande rivolte popolâr de storie furlane. Tes prossimis iniziativis in program, dut câs, si varà ocasion di fevelâ ancje di altris episodis di riviel capitâts in Friûl. Di ce si tratial? Ancjemò un tic di pazience!

04/03/11

Mieçs di comunicazion e Joibe Grasse

La setemane che si è sierade cui 27 di Fevrâr - date là che a colavin juscj i cinccent agns dal riviel de Joibe Grasse - e à viodût cuasi ducj i mieçs di comunicazion di chenti dedicâi a chest episodi di storie furlane e aes iniziativis imbastidis par ricuardâlu un pôc di spazi. Cualchidun se à gjavade cun pôc, cualchidun invezit i à dât une vore di spazi. Il câs plui significatîf, cemût che si veve za ricuardât, al è stât chel di Radio Onde Furlane cuntune zornade interie dedicade al teme. Cualchidun al à fevelât ancje des iniziativis de Associazion 1511, cualchidun altri invezit al à vût miôr restâ cidin. Nus somee just ricuardâ almancul cualchidun di chei che a àn cirût di frontâ chest argoment in maniere plui complete, tra di chescj il setemanâl "la Vita Cattolica" e il cuindisinâl "il Diari". Une segnalazion ancje pal servizi des "Gnovis" par furlan de Regjon Friûl - Vignesie Julie che, cundut dal spazi limitât a disposizion, al à metût jù une presentazion plui complete di altris. Sperìn dome che cumò, passade la setemane dal inovâl, la atenzion no si sfanti dal dut.

03/03/11

Su "Alc&cè" e je rivade la Joibe Grasse

Sul numar di Fevrâr di "Alc&cè" - la riviste par fruts da "La Vita Cattolica" - la cuviertine e il speciâl su la storie a son dedicâts al riviel de Joibe Grasse dal 1511. Si trate di une iniziative impuartante par fâ cognossi che pagjine impuartante de storie furlane ancje ai fruts.
Inte riviste - curade di Erika Adami - al è un articul che al presente in struc il riviel de Joibe Grasse, ma ancje un spazi là che si segnalin i lûcs de rivolte: une ipotesi di percors alternatîf par visitâ un pôcs dal lûcs storics plui biei dal Friûl.
A compagnâ il test a son ancje diviersis imagjins, ancje un pâr gjavadis fûr des contis a fumuts che a àn partecipât ae edizion 2010 dal Premi Friûl (si trate in particolâr dai lavôrs di Guido Carrara e Lorenzo Manià).
Par cui che al vûl dâi un cuc ae riviste al pues lâ achì, là che al cjate l'archivi cun ducj i numars di "Alc&cè".

01/03/11

Serade su la Joibe Grasse a Listize

Gnûf apontament dedicât ae Joibe Grasse che al viôt ancje la partecipazion de Associazion 1511. Miercus ai 2 di Març, alì dal Auditorium comunâl di Listize, a vot e mieze di sere (20.30), il president de associazion, Carli Pup, al tignarà une introduzion storiche al riviel popolâr furlan dal 1511. Subite dopo si varà un spetacul dal grup teatrâl Anà-thema che al sviluparà il teme des ipotizadis lidrîs furlanis dal mît di "Romeo and Juliet".