Su Onde Furlane la Zornade Furlane dai Dirits

Zaromai di cualchi an, intal inovâl dal riviel de Joibe Grasse dal 1511, diviersis realtâts furlanis a àn decidût di celebrâ la Zornade Furlane dai Dirts. Ta cheste suaze la iniziative plui significative e je dal sigûr la programazion speciâl che Radio Onde Furlane e propon pe ocasion. Cussì, lunis ai 27 di Fevrâr, di vot e mieze di buinore fin siet sot sere (08.30 – 19.00), su lis frecuencis de emitente furlane al puest dai programs normâi a laran in onde une schirie di aprofondiments e e di speciâi musicâi in teme cun chê zornade.

Vie pe buinore (tra 10 e mieze e misdì) si fevelarà di dirits linguistics cul sindic di Migjee Alberto Bergamin, cu la presidente provinciâl de SKGZ Luigia Negro e cul membri de Comission regjonâl pe minorance todescje Velia Plozner. Tra misdì e la une (12.00 – 13.00) si darà spazi al teme dal dirit al lavôr cui intervents dal segretari regjonâl de Cgil Franco Belci e di Guerrino Cecotti, un dai protagoniscj des lotis dal Cormôr.

Tal dopodimisdì, tra trê e sîs (15.00 – 18.00), si fevelarà invezit di difese dal teritori furlan, cun aprofondiments su TAV cun Giancarlo Pastorutti (Comitâts No TAV de Basse furlane), sul dopleament de centrâl di Somplât cun Franceschino Barazzutti (Comitât pe difese des aghis dal bacin montan dal Tiliment), su la autostrade Cimpel – Glemone cun Lucia D’Andrea (Comitât ARCA), e sul eletrodot Redipulie – Udin cun Aldevis Tibaldi (Comitât pe vite dal Friûl rurâl).

Nus somee plui che avonde par sintonizâsi sui 90 Mhz di Onde Furlane.

Presentazion de "La Comugne" sul 1511 a Udin

Il numar de riviste leterarie par furlan "La Comugne" dedicât ae Joibe Grasse dal 1511 al ven presentât miercus ai 21 di Dicembar tor 9 di sere alì dal circul Arci Mis(s)Kappa di Udin.

Par presentâlu a saran presincj Alessandra Kersevan, editore de riviste, Pauli Cantarut, curadôr de Comugne, Checo Tam e Gianfranco Pellegrini, autôrs di dôs des contis che si puedin lei ta chest numar de riviste, e Carli Pup, rapresentant de Associazion 1511. Pe ocasion si varès di vê ancje une scorsade dal innomenât musicist furlan dj Tubet.

Ta chest numar de riviste si cjatin tescj di aprofondiment storic, contis ispiradis al plui grant riviel popolâr de storie furlane e ancje riflessions sul Friûl a cinccent agns di chê rivolte.

"La Comugne", numar monografic sul 1511

Al è jessût il gnûf numar de riviste leterarie par furlan "La Comugne" editade de cjase editore Kappa Vu. Si trate di un numar monografic dedicât di plante fûr ae Joibe Grasse dal 1511 cun tescj di aprofondiment storic, contis ispiradis al plui grant riviel popolâr de storie furlane e ancje riflessions sul Friûl a cinccent agns di chê rivolte. La prime presentazion publiche di chest numar de riviste si le varà inte suaze de iniziative "Aperitivi con l'autore", vinars ai 2 di Dicembar a 7 sot sere alì de tratorie "Cuochi per voi", inte place dal municipi a Basilian. Intant de serade a intervignaran, tra i altris, il curadôr de riviste Pauli Cantarut, il scritôr Checo Tam e il rapresentant de Associazion 1511 Carli Pup.

"1511 il Friûl de Joibe Grasse" ai Riçs

Vinars ai 11 di Novembar si varà une gnove presentazion de mape - libri "1511 il Friûl de Joibe Grasse" fat di Luigino Peressini (mape) e di Carli Pup (tescj) e editât de cooperative Serling. L'apontament si tignarà alì dal Circul "Nuovo Orizzonti" dai Riçs tor 9 di sere. La serade e je stade metude adun dal Circul in colaborazion cu la Serling e cu la Associazion 1511.

Si trate di une ocasion par cognossi plui di dongje chest toc impuartant de storie furlane capitât juste cinccent agns indaûr. A fevelâ di chest teme a saran i doi curadôrs de publicazion compagnâts, pe prime volte, ancje dal musicist Gianfranco Lugano che aes imagjins e aes peraulis al zontarà cussì ancje la musiche par rindi inmò plui vivarose la serade.

Dôs lezions sul 1511 ae UTE di Spilimberc

Dentri dal program dal vincjecuatresim an academic de Universitât de Tierce Etât di Spilimberc si varan ancje dôs lezions dedicadis al riviel furlan dal 1511. La prime des dôs lezions e je in program, alì de aule magne de Cjase dal student di Spilimberc, joibe ai 27 di Otubar e e sarà centrade su la situazion politiche e sociâl dal Friûl ae vilie dal riviel. La seconde si davuelzarà simpri intal stes sît joibe ai 10 di Novembar e e larà a fevelâ de dinamiche dal riviel e des sôs consecuencis. Dutis e dôs lis lezions a tacaran a 3 dopodimisdì par sierâsi a 5 e a saran tignudis dal president de Associazion 1511, Carli Pup. La partecipazion e je dome pai iscrits ae UTE.

Sabide a Basandiele storie e liende dal 1511

Friûl 1511, la storie e la liende. Al è il titul dal apontament metût adun par sabide prin di Otubar, a tacâ des nûf mancul un cuart di sere (20.45), dal assessorât pe culture dal Comun di Cjampfuarmit (in colaborazion cul circuit "Cultura Nuova") inte suaze dal cicli "Une sere a Teatri". La iniziative si davuelzarà alì dal teatri Tenda di Basandiele.

L'apontament al è svilupât in dôs parts. Inte prime si varà une introduzion storiche sul riviel de Joibe Grasse dal 1511 curade di Carli Pup par cont de Associazion 1511, la seconde invezit e previôt un spetacul teatrâl ispirât al mît di Romeu e Juliete curât di Aná-thema Teatro. A leâ lis dôs parts al sarà un intervent de assessore pe culture dal Comun di Cjampfuarmit, mara Mestroni.

La storie de Joibe Grasse a FAFieste ai 2 di Setembar

Vinars ai 2 di Setembar, a 7 di sere (19.00), alì dal tendon di Blessan, si varà l'ultin dai apontaments estîfs cu la Associazion 1511. Si trate di une conference storiche sul riviel de Joibe Grasse dal 1511 tignude di Carli Pup là che si fevelarà des causis, dal svilups e de ereditât de plui grande rivolte popolâr furlane. La iniziative e je cjapade dentri inte FAFieste, manifestazion inmaneade dai Fantats Furlans che si davuelzarà dal prin ai trê di Setembar.

Simpri vinars, ma a 9 di sere (21.00), dentri de FAFieste si varan i concierts di Ulisse e i Ciclopi (che a àn a pene vinçût il Premi Friûl), dai Parafangos e dai Ad Plenitatem Lunae (grup che, cemût che us vevin za contât, al à dedicât un dai siei tocs propit ae Joibe Grasse dal 1511). A saran po i bancuts di diviersis grups tant che la associazion "Lenghis dal drâc - Amîs di Onde Furlane" e dal Comitât Friûl - Euskal Herria là che, se o cjalais ben, o cjatarês ancje materiâi dedicâts ai 1511. Cun di plui, dentri de fieste, al è ancje ce mangjâ e ce bevi.

"Fûcs su lis culinis" ai 12 di Avost a Buie

Vinars ai 12 di Avost a 9 mancul un cuart di sere (20.45), alì de ostarie di Parùs a Saramont di Buie al torne l'apontament cun "Fûcs su lis culinis. Storiis di riviel tal Friûl culinâr".

Dilunc vie de serade si contaran lis vicendis di trê rivoltis furlanis: la insurezion popolâr de Joibe Grasse dal 1511, i disordins dal 1841 a S. Denêl cuintri de privatizazion des comugnis, e il riviel di Sarsêt dal 1867 cuintri de "vuardie nazionâl".

Dopo di Murùs e di Vildivar, "Fûcs su lis culinis" al rive ancje a Buie in gracie de colaborazion jenfri la associazion "El Tomât" e la associazion 1511. Par mieç di leturis di cronichis contemporaniis ai fats, di tocs di leterature furlane dedicâts a chescj episodis storics, di moments di ricostruzion storiche e des musichis dal "Vididule Project" si varà cussì la ocasion par tornâ a scuvierzi trê acjadiments de storie furlane che a restin ancjemò pôc o nuie cognossûts.

Contecurte 1511 intal fuartin di Vençon ai 5 di Avost

Vinars ai 5 di Avost, a nûf di sere (21.00), alì dal fuartin venezian di Vençon si varà un gnûf apontament cun "Contecurte 1511". La iniziative e viôt adun la Associazion 1511, la Ostarie leterarie Contecurte, Radio Onde Furlane, il Sportel intercomunâl pe lenghe furlane dal Glemonàs, il Comun e la Pro Loco di Vençon.

Ancje chest viaç "Contecurte 1511" e à cjatât acet intun sît pardabon inmagant, ven a dî il fuartin venezian di Vençon che nol è tant che al è stât restaurât. Tal câs però che al ves di jessi brut timp l'apontament si tignarà alì dal palaç dal Comun di Vençon.

Il riviel dal 1511 al sarà inmò une volte il protagonist di une schirie di storiis metudis adun inte suaze dal progjet leterari di Contecurte. Chestis contis - daûr tradizion une e je simpri fate di pueste pe ocasion e leade al teritori là che si davuelç la iniziative - a saran proponudis intune cun tocs di cronichis dal '500, cun contis popolârs e cun fruçons di aprofondiment storic. A compagnâ il public dilunc vie de serade a saran lis vôs di Raffaele Serafini, Checo Tam e Carli Pup. Cun di plui, cheste volte, la serade e sarà ancje compagnade de musiche sunade di Marco Tomasin.

Joibe a Cividât si fevele dal 1511

Joibe ai 28 di Lui a Cividât, alì di palaç Costantini (za palaç Craigher - Gabrici in vie "IX agosto"), a vot e mieze di sere (20.30), si davuelç l'apontament cun "Gotis di storie e di culture" che chest an al à par teme il 1511, sei par fevelâ dal riviel sei dal taramot che al à scjassât il Friûl ai 26 di Març di chel an. Cun di fat, il titul de manifestazion metude adun de famee Costantini, dal Circul di culture "Ivan Trinko", de Universitât de Tierce Etât e dal ERAPLE, al è "1511: l'uomo e la natura si ribellano".A dâ il lôr contribût a son po ancje la Union dal emigrants slovens / Slovenci po svetu, la SOMSI di Cividât e la Associazion 1511. Dilunc vie de serade si viodaran lis imagjins leadis ai taramots furlans, si scoltaran lis musichis di Marta Vigna, Stefano Fornasaro e dai grup dai sunadôrs di armoniche di Saint Gilles, e si sintaran i intervents storics di Carli Pup (pe Associazion 1511) e dal scritôr Franco Fornasaro moderâts di Adolfo Londero.

Contecurte 1511 intal mulin di Rivis ai 16 di Jugn

Ai 16 di Jugn, a nûf mancul un cuart (20.45), alì dal mulin di Rivis di Sedean si davuelzarà "Contecurte 1511", un apontament a cjaval tra storie e leterature dedicât al riviel de Joibe Grasse. A proponi la iniziative, metude adun de Associazion 1511, de Ostarie leterarie di Contecurte e di Onde Furlane, al è il Comun di Sedean cul jutori de Pro Loco di Rivis.

Inte suaze incantesemade dal mulin di Rivis, il riviel dal 1511 al sarà il protagonist di une schirie di storiis metudis adun inte suaze dal progjet leterari di Contecurte, che a laran a miscliçâsi cun tocs di cronichis dal '500, contis popolârs e fruçons di aprofondiment storic. A dâi vôs a contis antighis e modernis a saran Raffaele Serafini, Checo Tam e Carli Pup. Un viaç indaûr inte nestre storie, judâts de atmosfere cence timp dal lûc.

Tal câs che al sedi brut timp la serade si fasarà distès, ma dentri dal mulin.

"1511 il Friûl de Joibe Grasse" a Remanzâs

Martars ai 7 di Jugn a Remanzâs, alì de ostarie "Posto di conversazione"  (in vie Marconi), a vot e mieze di sere (20.30), si varà la presentazion di "1511 il Friûl de Joibe Grasse", la publicazion de cooperative Serlingcu la mape di Luigino Peressini e i tescj di Carli Pup.

Intant de serade i doi autôrs a contaran la storie dal plui grant riviel popolâr furlan: dal cressi des tensions sociâls ae faide jenfri Strumîrs e Çamberlans, de vuere tra Vignesie e l'Imperi ai savoltaments dal Carnavâl, par rivâ po ae fin dal riviel, ma ancje ae ereditât che al à lassât ai furlans. Une gnove ocasion, duncje, par recuperâ un toc impuartant de storie dal popul furlan.

Cui 28 di Mai "Riviei di ingjustri" al Visionario

Sabide ai 28 di Mai a sîs e mieze sot sere (18.30) alì de sale esposizions dal Visionario di Udin si scree "Riviei di ingjustri", la mostre des taulis origjinâls dai fumuts che a àn partecipât ae edizion 2010 dal Premi Friûl di Onde Furlane che e jere dedicade ae Joibe Grasse dal 1511. La iniziative e je inmaneade di Informazione Friulana / Radio Onde Furlane e de Associazion 1511 cul jutori dal assessorât pe culture dal Comun di Udin.

Dentri di "Riviei di ingjustri", in plui des contis a fumuts metudis adun di diviers autôrs (Guido Carrara; Lorenzo Manià; Nicola Angeli e Fabio Varnerin; Emilio Bertossi; Eleonora Spizzamiglio; Enrico Tomasi; progjet MaMaRuTo) pal Premi Friûl, si podaran viodi ancje des taulis origjinâls di Luigino Peressini, l'artist furlan che cul so "Vitis di un vilan salvadi" al è stât il prin a cubiâ fumuts e Joibe Grasse dal 1511. A compagnâ il materiâl ilustrât a saran ancje des notis storics che a permetaran di insuazâ miôr causis e davuelziment dal riviel.

La mostre e restarà vierte fin ai 11 di Jugn cui oraris de sale esposizions dal Visionario, ven a dî plui o mancul di cuatri tal dopodimisdì a nûf e mieze di sere (16.00-21.30). Inte figure si viôt un particolâr di une des taulis di Lorenzo Manià.

Joibe, vinars e sabide cunvigne su riviei e ribelisim

Inte suaze des iniziativis in program pai cinccent agns dal riviel de Joibe Grasse si varà ancje une cunvigne di trê dîs inmaneade des Universitâts dal Friûl, dal Litorâl e Ca' Foscari di Vignesie che e je stade batiade "Riviei e ribelisim tra ete di mieç e etât moderne".

L'apontament si davuelç su trê zornadis: joibe ai 12 di Mai alì dal salon dal Parlament de Patrie dal Friûl, in cjistiel a Udin (15.00 - 19.00); vinars ai 13 di Mai tal salon dal cjistiel di Colorêt di Montalban (9.30 - 13.00 / 14.30 - 18.30); e sabide ai 14 di Mai alì de sale Gusmani di palaç Antonini a Udin (9.30 - 13.00).

E je la ocasion par scoltâ passe une vincjine di esperts che a fevelaran dai riviei che a àn tocjât chest toc di Europe tra il '400 e il '500, ma ancje dai elements sociâi e culturâi che a jerin daûr des rivoltis popolârs e dai scuintris tra fazions che a àn segnât chê ete storiche. Une ocasion impuartante, duncje, par cui che si interesse di chescj argoments.

"1511 il Friûl de Joibe Grasse" a Cjampfuarmit

Joibe ai 21 di Avrîl, alì de ostarie "A la Patrie dal Friûl" a Cjampfuarmit (te place là che al è ancje il palaç dal Comun), a vot e mieze di sere (20.30), si davuelzarà une gnove presentazion di "1511 il Friûl de Joibe Grasse": la publicazion de cooperative Serling che e met adun la mape creade di Luigino Peressini e i tescj scrits di Carli Pup par contâ la storie dal plui grant riviel popolâr furlan.

Inte suaze carateristiche e ospitâl de ostarie, i doi autôrs a proponaran un viaç intal Friûl dal 1511 framieç dal cressi des tensions sociâls, de faide jenfri Strumîrs e Çamberlans, de vuere tra Vignesie e l'Imperi, dai savoltaments dal Carnavâl, par rivâ po al sclop, al svilup e ae fin dal riviel, ma ancje ae ereditât che al à lassât ai furlans.

Une gnove ocasion par cognossi miôr la storie dal Friûl e par recuperâ un toc impuartant de nestre memorie di popul.

"Fûcs su lis culinis" ai 9 di Avrîl a Vildivar

Dopo de serade de setemane stade a Murùs, la Associazion 1511 e propon “Fûcs su lis culinis. Storiis di riviel tal Friûl culinâr” ancje a Vildivar. L'apontament al è sabide ai 9 di Avrîl a vot e mieze di sere (20.30) alì de sale dal Consei comunâl di Vildivar.

La iniziative - che e diven de colaborazion tra il Comun di Vildivar, la Associazion 1511, la Serling, la Associazion “El Tomât” e il grup “Vididule Project” - e propon un aprofondiment a cjaval tra storie, croniche, leterature e musiche su trê rivoltis furlanis: chê de Joibe Grasse dal 1511; chê dal 1841 a S. Denêl cuintri de privatizazion des comugnis; e chê di Sarsêt dal 1867 cuintri de “vuardie nazionâl”.

Intant de serade, i atôrs Daniela Zorzini e Daniele Copetti a proponaran la leture seniche di tocs gjavâts fûr sei di cronichis di chei agns, sei di oparis leterariis scritis di Alviero Negro e Riedo Puppo. Carli Pup invezit al proponarà la ricostruzion storiche dai trê episodis. I musiciscj dal “Vididule Project” a compagnaran leturis e intervents storics cuntun repertori di musichis tradizionâls e tocs componûts di pueste pe ocasion.

Ai 2 di Avrîl "Fûcs su lis culinis" a Murùs

A van indenant lis iniziativis che la Associazion 1511 e je daûr a svilupâ ator pal Friûl pai cinccent agns dal riviel de Joibe Grasse. Sabide ai 2 di Avrîl a vot e mieze di sere (20.30) si varà un gnûf apontament a Murùs, simpri alì dal Auditorium comunâl “Riedo Puppo”.

Si trate de anteprime di “Fûcs su lis culinis. Storiis di riviel tal Friûl culinâr”. Chest colp, di fat, no si fevele dome de Joibe Grasse dal 1511, ma ancje di altris dôs rivoltis furlanis: chê dal 1841 a S. Denêl cuintri de privatizazion des comugnis; e chê di Sarsêt dal 1867 cuintri de “vuardie nazionâl”. La serade e devente duncje la ocasion par tornâ a scuvierzi trê moments dismenteâts o pôc cognossûts de nestre storie.

Dilunc vie de serade i atôrs Daniela Zorzini e Daniele Copetti a proponaran la leture seniche di tocs gjavâts fûr sei di cronichis e documents di chei agns, sei di oparis leterariis scritis di Alviero Negro e Riedo Puppo e dedicadis propite a chei episodis. La ricostruzion storiche des trê rivoltis invezit e sarà curade di Carli Pup. A compagnâ leturis e intervents storics a saran i musiciscj dal “Vididule Project” cuntun repertori di musichis tradizionâls e tocs componûts di pueste pe ocasion.

Daûr de iniziative, in plui de Associazion 1511, a son il Comun di Murùs, la Serling, la associazion “El Tomât” e il grup musicâl “Vididule Project”.

Miercus serade su la Joibe Grasse a Codroip

Al sarà il riviel de Joibe Grasse dal 1511 a vierzi la seste edizion di "C'era una volta...", la manifestazion metude adun de SOMSI cul Comun di Codroip. L'apontament al è miercus ai 23 di Març, a nûf mancul un cuart di sere (20.45), alì de sale conferencis de biblioteche civiche di Codroip. La serade e previôt une conference sul teme svilupade dal president de Associazion 1511, Carli Pup. 

A van duncje indenant i apontaments sul teritori proponûts de associazion par fâ cognossi plui a fonts resons, dinamichis e protagoniscj de plui grande rivolte popolâr de storie furlane. Tes prossimis iniziativis in program, dut câs, si varà ocasion di fevelâ ancje di altris episodis di riviel capitâts in Friûl. Di ce si tratial? Ancjemò un tic di pazience!

Serade su la Joibe Grasse a Listize

Gnûf apontament dedicât ae Joibe Grasse che al viôt ancje la partecipazion de Associazion 1511. Miercus ai 2 di Març, alì dal Auditorium comunâl di Listize, a vot e mieze di sere (20.30), il president de associazion, Carli Pup, al tignarà une introduzion storiche al riviel popolâr furlan dal 1511. Subite dopo si varà un spetacul dal grup teatrâl Anà-thema che al sviluparà il teme des ipotizadis lidrîs furlanis dal mît di "Romeo and Juliet".

27 di Fevrâr: programazion speciâl su Onde Furlane

Za di cualchi an, ai 27 di Fevrâr intal inovâl dal riviel de Joibe Grasse, e ven ricuardade la Zornade Furlane dai Dirits. La iniziative e jere stade inviade dal Comitât 482 e ancje Radio Onde Furlane le à fate sô e, pe ocasion, e propon une programazion speciâl dute dedicade al teme dal dirits e de memorie dal riviel dal 1511.

Ancje chest an, cundut de situazion dificile che e je daûr a vivi la emitente, Onde Furlane e va indenant cun chest apontament che aromai al è deventât "tradizionâl". Une iniziative inmò plui significative viodût che intal 2011 a colin juscj cinccent agns dal riviel e là che ancje la Associazion 1511 e à puartât il so contribût.

La programazion speciâl pe Zornade Furlane dai Dirits dai 27 di Fevrâr e tache a 8 e mieze di buinore e e va indenant fin 6 e mieze tal dopodimisdì. Par vê une informazion plui in detai sul svilup de zornade e sui ospits che a àn puartât il lôr contribût baste cjalâ achì.

Buine scolte a ducj.