Une memorie che nus parten

Juste cinccent agns indaûr - si jere ai 27 di Fevrâr dal 1511 - al è sclopât a Udin il plui grant riviel popolâr de storie dal Friûl.

Se inte capitâl de Patrie dal Friûl, là che si àn vûts i episodis di sanc plui brutâi, la insurezion e je stade segnade a fuart de faide secolâr in at jenfri Strumîrs e Çambarlans, intal rest dal Friûl il riviel al à viodût tant che protagonistis lis comunitâts rurâls in lote par difindi i "dirits antîcs", o sei lis leçs e lis costumancis che ur garantivin plui libertât sul front economic e judiziari e plui autoguvier. Al è propit chest aspiet chel che nus somee impuartant di ricuardâ e di rivendicâ come memorie dal popul furlan.

Ta chestis zornadis - tant che Associazion 1511 - o vin inviât un percors di condivision di cheste memorie ator pai paîs dal Friûl. A Torate, a Cosean, a Murùs o sin restâts maraveâts denant de grande partecipazion de int, de atenzion mostrade, de voie di recuperâ cheste memorie. L'esempli di îr di sere al è significatîf: cundut dal disinterès de plui part dai mieçs di comunicazion, auditorium plen e fintremai int in pîts.

O volìn lâ indenant cun cheste esperience, zirâ pai paîs dal Friûl, cjatâsi cu la int, condividi cun lôr la memorie di chest riviel. Un riviel che nus parten, che e je la nestre storie, che nus permet di visâsi che se o volìn o podìn lotâ pai nestris dirits, o podìn concuistâ chei cjistiei che par secui a son stâts simbui di prepotence e di injustizie.

Nissun al à il dirit di robânus cheste memorie: bon 27 di Fevrâr a ducj!

27 di Fevrâr: programazion speciâl su Onde Furlane

Za di cualchi an, ai 27 di Fevrâr intal inovâl dal riviel de Joibe Grasse, e ven ricuardade la Zornade Furlane dai Dirits. La iniziative e jere stade inviade dal Comitât 482 e ancje Radio Onde Furlane le à fate sô e, pe ocasion, e propon une programazion speciâl dute dedicade al teme dal dirits e de memorie dal riviel dal 1511.

Ancje chest an, cundut de situazion dificile che e je daûr a vivi la emitente, Onde Furlane e va indenant cun chest apontament che aromai al è deventât "tradizionâl". Une iniziative inmò plui significative viodût che intal 2011 a colin juscj cinccent agns dal riviel e là che ancje la Associazion 1511 e à puartât il so contribût.

La programazion speciâl pe Zornade Furlane dai Dirits dai 27 di Fevrâr e tache a 8 e mieze di buinore e e va indenant fin 6 e mieze tal dopodimisdì. Par vê une informazion plui in detai sul svilup de zornade e sui ospits che a àn puartât il lôr contribût baste cjalâ achì.

Buine scolte a ducj.

A Murùs al torne il riviel de Joibe Grasse

Inte suaze des iniziativis metudis adun pai 500 agns dal riviel popolâr de Joibe Grasse, sabide ai 26 di Fevrâr a vot e mieze di sere (20.30), alì dal Auditorium comunâl "Riedo Puppo" di Murùs (che si cjate alì dal centri scolastic dilunc de strade jenfri Murùs e Breçà Disore) si varà la prime presentazion di "1511 Il Friûl de Joibe Grasse".

Si trate di une publicazion de cooperative Serling che e met adun une mape dal riviel disegnade dal artist Luigino Peressini e un librut bilengâl furlan / inglês curât di Carli Pup là che a son dentri lis peraulis clâf che a segnin il riviel de Joibe Grasse.

La publicazion e ven presentade dai doi autôrs cul compagnament dal Grup Strumentâl "S. Margherita" direzût dal mestri Orfeo Venuti che al proponarà tocs di musiche rinassimentâl e composizions origjinâls.

La iniziative e je nassude de colaborazion tra il Comun di Murùs, la Associazion 1511, la cooperative Serling e il grup strumentâl "S. Margherita". Si trate dome dal prin apontament dedicât al 1511 inmaneât de aministrazion comunâl di Murùs, massime in gracie de sensibilitât de assessore Albina Montagnese. Altris iniziativis a son za in program intai mês di Avrîl e Mai.

La Joibe Grasse su la Rai regjonâl

Cul svicinâsi dal inovâl dal riviel de Joibe Grasse a cressin lis iniziativis che lu ricuardin. Ancje la Rai regjonâl e frontarà l'argoment inte pontane de rubriche “Il Settimanale”che e larà in onde a misdì e vincjecinc (12.25) dentri de programazion televisive curade de TGR dal Friûl - Vignesie Julie.

La trasmission, che e je stade metude adun di Armando Mucchino, e propon trê intervistis: il professôr Furio Bianco de Universitât dal Friûl, che al è il storic che al à studiât plui a fonts l'argoment; l'artist furlan Tonino Cragnolini che al riviel de Joibe Grasse si veve ispirât par diviersis des sôs oparis; e Carli Pup tant che president de Associazion 1511. Cinc minûts a cjaval tra passât e presint dal plui grant riviel de storie dal Friûl.

Serade su la Joibe Grasse a Cosean

Joibe ai 24 di Fevrâr a Cosean, alì dal auditorium "La galetiere", a vot e mieze di sere e je in program une conversazion storiche sul riviel de Joibe Grasse. L'intervent principâl al sarà tignût dal president de Associazion 1511, Carli Pup.

La iniziative si insuaze intal cors di lenghe e culture furlane de S.F.F. coordenât dal professôr Graziano Urli e e je poiade de aministrazion comunâl di Cosean.

E sarà une ocasion par cognossi plui di dongje lis resons che a son daûr de insurezion dal 1511, il davuelziment dai fats e i efiets che il riviel al à vût in Friûl. L'incuintri al è viert a ducj e al sarà spazi ancje par un confront cul public argoments frontâts intant de serade.

Ducj a son invidâts.

Il program dal Comun di Udin pe Joibe Grasse

Il Comun di Udin al à comunicât ta chestis zornadis il program des iniziativis che a saran inmaneadis par ricuardâ i cinccent agns dal riviel de Joibe Grasse dal 1511.

I apontaments a son di gjenar diferent - si va des mostris ai spetacui teatrâi, des visitis vuidadis ai incuintris di divulgazion - e si inviaran vinars ai 25 di Fevrâr par lâ indenant fin in Astât. Dut câs, par un cuadri plui in detai des iniziativis si pues lâ a viodi achì.

Tal comitât organizadôr metût adun de aministrazion comunâl udinese e à puartât il so contribût ancje la Associazion 1511, adun cu la Universitât dal Friûl, cul Archivi di Stât e cu la Academie udinese di Siencis, Letaris e Arts.

Tra i apontaments in program, intune cu la cooperative Informazione Friulana, la Associazion 1511 e à curât in particolâr la mostre "Riviei di ingjustri" che si davuelzarà alì de sale esposizions dal Visionario dai 28 di Mai ai 11 di Jugn. Si trate di une mostre dai fumuts dedicâts al riviel dal 1511, ma su chest argoment o varìn dal sigûr ocasion di tornâi parsore plui indenant.

I 500 agns dal riviel su "La Patrie dal Friûl"

Intal numar di Zenâr-Fevrâr de "La Patrie dal Friûl", jessût propit ta chestis zornadis, a cjatin une grande evidence i articui dedicâts ai 500 agns dal riviel de Joibe Grasse, cence dismenteâ il spazi pardabon impuartant che il mensîl furlan al à dedicât ae nestre associazion.

Cundut che la "Patrie" e je a pene jessude, sul so sît internet al è za disponibil un dai articui dedicâts al riviel. Il toc, che al è titulât "I 500 agns dal riviel de Joibe Grasse", al è stât scrit di Donato Toffoli e al tache cussì:

"Ai 27 di Fevrâr dal 2011 a saran juste cinc secui de zornade, la Joibe grasse dal 1511″, li che plui elements che a jerin za in moviment in Friûl a precipitarin tune insurezion popolâr che, prime a Udin po intune grande part de nestre tiere, e metè in discussion, in maniere radicâl e violente, i ecuilibris di podê politics e sociâi di chê ete. La storie dal Friûl, lassant in bande chei che si ocupin di storie in maniere professionâl o par passion, e je za avonde pôc cognossude; chest aveniment, che al à une impuartance cence confronts pe sô vastitât te storie de Rinassince taliane (e salacor i paragons si à di fâju cun altris tieris de Europe centrâl), al è inmò di plui tignût intun cjanton." Par lâ indenant cu la leture dal articul us invidìn a lâ achì.

Une voglade ator pe rêt

O vevin za fevelât dal interès de comunitât slovene de nestre regjon pal riviel de Joibe Grasse dal 1511, ancje in gracie de ativitât davuelte de Associazion 1511. O tornìn sul argoment par segnalâ l'articul publicât sul cuotidian in lenghe slovene "Primorski Dnevnik" e che o podês cjatâ ancje sul sît internet dal gjornâl (achì).

Di chê strade o segnalìn ancje il fat che la vierzidure di chest spazi che la Associazion 1511 e à su la rêt, e je stade segnalade di un pôcs di blogs furlans di stamp ancje une vore diviers tra di lôr. Al è il câs di "Furlans, digjitait furlan!", il blog che al fâs riferiment al mensîl "La Patrie dal Friûl", ma ancje dal blog dal PD di Palaçûl o chel di Done Bete. Un grazie a ducj lôr pe atenzion che nus àn mostrât.

Partîts di Torate i apontaments cu la Associazion

Vie pal 1511, almancul par chel che o savìn, i ultins fûcs dal riviel de Joibe Grasse si son distudâts intal Friûl ocidentâl. A cinccent agns di distance, duncje, cuâl puest miôr di chest toc di Friûl par tornâ a piâ il fûc e par tacâ i apontaments che a viodin protagoniste la Associazion 1511?

Cussì, îr di sere a Torate di Cjons, ospits de Università della Campagna, doi rapresentants de Associazion adun cun Luigino Peressini (autôr de conte a fumuts "Vitis di un vilan salvadi" che e conte dal riviel de Joibe Grasse) a àn vût la ocasion di fevelâ di chel episodi storic denant di un public numerôs e une vore interessât (cun personis rivadis ancje dal Venit par cognossi miôr chest toc di storie).

La serade e je stade però la ocasion ancje par fâ un confront tra il Friûl dal secul XVI e chel dal dì di vuê, massime par chel che al rivuarde il teme dai dirits. Un teme che si larà dilunc a frontâ ancje in altris apontaments in program chest an ator pal teritori. L'intindiment de Associazion, di fat, al è chel di zirâ pal Friûl come lis colonis dai contadins di cinc secui indaûr, sei par di ca che par di là dal Tiliment.

Chel di Torate al è stât pardabon un grant biel tacâ. Grazie a ducj chei che a son vignûts a scoltâ e grazie soredut a dutlis lis feminis e a ducj i oms de Università della Campagna che a àn savût svilupâ un ambient di incuintri e di condivision de cognossince maraveôs (e là che , par zonte, si mangje di pape).