Su Onde Furlane la Zornade Furlane dai Dirits

Zaromai di cualchi an, intal inovâl dal riviel de Joibe Grasse dal 1511, diviersis realtâts furlanis a àn decidût di celebrâ la Zornade Furlane dai Dirts. Ta cheste suaze la iniziative plui significative e je dal sigûr la programazion speciâl che Radio Onde Furlane e propon pe ocasion. Cussì, lunis ai 27 di Fevrâr, di vot e mieze di buinore fin siet sot sere (08.30 – 19.00), su lis frecuencis de emitente furlane al puest dai programs normâi a laran in onde une schirie di aprofondiments e e di speciâi musicâi in teme cun chê zornade.

Vie pe buinore (tra 10 e mieze e misdì) si fevelarà di dirits linguistics cul sindic di Migjee Alberto Bergamin, cu la presidente provinciâl de SKGZ Luigia Negro e cul membri de Comission regjonâl pe minorance todescje Velia Plozner. Tra misdì e la une (12.00 – 13.00) si darà spazi al teme dal dirit al lavôr cui intervents dal segretari regjonâl de Cgil Franco Belci e di Guerrino Cecotti, un dai protagoniscj des lotis dal Cormôr.

Tal dopodimisdì, tra trê e sîs (15.00 – 18.00), si fevelarà invezit di difese dal teritori furlan, cun aprofondiments su TAV cun Giancarlo Pastorutti (Comitâts No TAV de Basse furlane), sul dopleament de centrâl di Somplât cun Franceschino Barazzutti (Comitât pe difese des aghis dal bacin montan dal Tiliment), su la autostrade Cimpel – Glemone cun Lucia D’Andrea (Comitât ARCA), e sul eletrodot Redipulie – Udin cun Aldevis Tibaldi (Comitât pe vite dal Friûl rurâl).

Nus somee plui che avonde par sintonizâsi sui 90 Mhz di Onde Furlane.

Presentazion de "La Comugne" sul 1511 a Udin

Il numar de riviste leterarie par furlan "La Comugne" dedicât ae Joibe Grasse dal 1511 al ven presentât miercus ai 21 di Dicembar tor 9 di sere alì dal circul Arci Mis(s)Kappa di Udin.

Par presentâlu a saran presincj Alessandra Kersevan, editore de riviste, Pauli Cantarut, curadôr de Comugne, Checo Tam e Gianfranco Pellegrini, autôrs di dôs des contis che si puedin lei ta chest numar de riviste, e Carli Pup, rapresentant de Associazion 1511. Pe ocasion si varès di vê ancje une scorsade dal innomenât musicist furlan dj Tubet.

Ta chest numar de riviste si cjatin tescj di aprofondiment storic, contis ispiradis al plui grant riviel popolâr de storie furlane e ancje riflessions sul Friûl a cinccent agns di chê rivolte.

"La Comugne", numar monografic sul 1511

Al è jessût il gnûf numar de riviste leterarie par furlan "La Comugne" editade de cjase editore Kappa Vu. Si trate di un numar monografic dedicât di plante fûr ae Joibe Grasse dal 1511 cun tescj di aprofondiment storic, contis ispiradis al plui grant riviel popolâr de storie furlane e ancje riflessions sul Friûl a cinccent agns di chê rivolte. La prime presentazion publiche di chest numar de riviste si le varà inte suaze de iniziative "Aperitivi con l'autore", vinars ai 2 di Dicembar a 7 sot sere alì de tratorie "Cuochi per voi", inte place dal municipi a Basilian. Intant de serade a intervignaran, tra i altris, il curadôr de riviste Pauli Cantarut, il scritôr Checo Tam e il rapresentant de Associazion 1511 Carli Pup.

"1511 il Friûl de Joibe Grasse" ai Riçs

Vinars ai 11 di Novembar si varà une gnove presentazion de mape - libri "1511 il Friûl de Joibe Grasse" fat di Luigino Peressini (mape) e di Carli Pup (tescj) e editât de cooperative Serling. L'apontament si tignarà alì dal Circul "Nuovo Orizzonti" dai Riçs tor 9 di sere. La serade e je stade metude adun dal Circul in colaborazion cu la Serling e cu la Associazion 1511.

Si trate di une ocasion par cognossi plui di dongje chest toc impuartant de storie furlane capitât juste cinccent agns indaûr. A fevelâ di chest teme a saran i doi curadôrs de publicazion compagnâts, pe prime volte, ancje dal musicist Gianfranco Lugano che aes imagjins e aes peraulis al zontarà cussì ancje la musiche par rindi inmò plui vivarose la serade.

Dôs lezions sul 1511 ae UTE di Spilimberc

Dentri dal program dal vincjecuatresim an academic de Universitât de Tierce Etât di Spilimberc si varan ancje dôs lezions dedicadis al riviel furlan dal 1511. La prime des dôs lezions e je in program, alì de aule magne de Cjase dal student di Spilimberc, joibe ai 27 di Otubar e e sarà centrade su la situazion politiche e sociâl dal Friûl ae vilie dal riviel. La seconde si davuelzarà simpri intal stes sît joibe ai 10 di Novembar e e larà a fevelâ de dinamiche dal riviel e des sôs consecuencis. Dutis e dôs lis lezions a tacaran a 3 dopodimisdì par sierâsi a 5 e a saran tignudis dal president de Associazion 1511, Carli Pup. La partecipazion e je dome pai iscrits ae UTE.

Sabide a Basandiele storie e liende dal 1511

Friûl 1511, la storie e la liende. Al è il titul dal apontament metût adun par sabide prin di Otubar, a tacâ des nûf mancul un cuart di sere (20.45), dal assessorât pe culture dal Comun di Cjampfuarmit (in colaborazion cul circuit "Cultura Nuova") inte suaze dal cicli "Une sere a Teatri". La iniziative si davuelzarà alì dal teatri Tenda di Basandiele.

L'apontament al è svilupât in dôs parts. Inte prime si varà une introduzion storiche sul riviel de Joibe Grasse dal 1511 curade di Carli Pup par cont de Associazion 1511, la seconde invezit e previôt un spetacul teatrâl ispirât al mît di Romeu e Juliete curât di Aná-thema Teatro. A leâ lis dôs parts al sarà un intervent de assessore pe culture dal Comun di Cjampfuarmit, mara Mestroni.

La storie de Joibe Grasse a FAFieste ai 2 di Setembar

Vinars ai 2 di Setembar, a 7 di sere (19.00), alì dal tendon di Blessan, si varà l'ultin dai apontaments estîfs cu la Associazion 1511. Si trate di une conference storiche sul riviel de Joibe Grasse dal 1511 tignude di Carli Pup là che si fevelarà des causis, dal svilups e de ereditât de plui grande rivolte popolâr furlane. La iniziative e je cjapade dentri inte FAFieste, manifestazion inmaneade dai Fantats Furlans che si davuelzarà dal prin ai trê di Setembar.

Simpri vinars, ma a 9 di sere (21.00), dentri de FAFieste si varan i concierts di Ulisse e i Ciclopi (che a àn a pene vinçût il Premi Friûl), dai Parafangos e dai Ad Plenitatem Lunae (grup che, cemût che us vevin za contât, al à dedicât un dai siei tocs propit ae Joibe Grasse dal 1511). A saran po i bancuts di diviersis grups tant che la associazion "Lenghis dal drâc - Amîs di Onde Furlane" e dal Comitât Friûl - Euskal Herria là che, se o cjalais ben, o cjatarês ancje materiâi dedicâts ai 1511. Cun di plui, dentri de fieste, al è ancje ce mangjâ e ce bevi.

Il 1511 ancje in trê riis

Inte seconde edizion dal concors leterari "In trê riis", inmaneât de associazion culturâl "Colonos" di Vilecjaze e dedicât ae scriture di une conte par furlan che e stedi dentri intes 180 batudis, la vitorie e je lade a di un test leât al 1511. Il prin premi, di fat, al è lât ae conte "Un altri carnevâl" scrite di Christian Romanini (te foto si pues viodi un moment de premiazion).

Il test al è stât sielzût de jurie tra i siet finaliscj che a vevin passât la prime selezion. In dut, la partecipazion ae edizion 2011 dal concors e je stade di 55 tescj che a son stâts fats indenant di 38 zovins (par partecipâ, di fat, no si à di passâ i 35 agns).

Viodût che si trate di contis pardabon curtis, o podìn proponius in version integrâl il test che al à vinçût il concors: "Lui le cjalâ. Jê, sbassant i voi, e sintive cressi chel sintiment che i scjaldave il cûr. E di lontan i fûcs dai palaçs dai siôrs a inluminavin la gnot de Joibe grasse dal 1511."

"Fûcs su lis culinis" ai 12 di Avost a Buie

Vinars ai 12 di Avost a 9 mancul un cuart di sere (20.45), alì de ostarie di Parùs a Saramont di Buie al torne l'apontament cun "Fûcs su lis culinis. Storiis di riviel tal Friûl culinâr".

Dilunc vie de serade si contaran lis vicendis di trê rivoltis furlanis: la insurezion popolâr de Joibe Grasse dal 1511, i disordins dal 1841 a S. Denêl cuintri de privatizazion des comugnis, e il riviel di Sarsêt dal 1867 cuintri de "vuardie nazionâl".

Dopo di Murùs e di Vildivar, "Fûcs su lis culinis" al rive ancje a Buie in gracie de colaborazion jenfri la associazion "El Tomât" e la associazion 1511. Par mieç di leturis di cronichis contemporaniis ai fats, di tocs di leterature furlane dedicâts a chescj episodis storics, di moments di ricostruzion storiche e des musichis dal "Vididule Project" si varà cussì la ocasion par tornâ a scuvierzi trê acjadiments de storie furlane che a restin ancjemò pôc o nuie cognossûts.

Contecurte 1511 intal fuartin di Vençon ai 5 di Avost

Vinars ai 5 di Avost, a nûf di sere (21.00), alì dal fuartin venezian di Vençon si varà un gnûf apontament cun "Contecurte 1511". La iniziative e viôt adun la Associazion 1511, la Ostarie leterarie Contecurte, Radio Onde Furlane, il Sportel intercomunâl pe lenghe furlane dal Glemonàs, il Comun e la Pro Loco di Vençon.

Ancje chest viaç "Contecurte 1511" e à cjatât acet intun sît pardabon inmagant, ven a dî il fuartin venezian di Vençon che nol è tant che al è stât restaurât. Tal câs però che al ves di jessi brut timp l'apontament si tignarà alì dal palaç dal Comun di Vençon.

Il riviel dal 1511 al sarà inmò une volte il protagonist di une schirie di storiis metudis adun inte suaze dal progjet leterari di Contecurte. Chestis contis - daûr tradizion une e je simpri fate di pueste pe ocasion e leade al teritori là che si davuelç la iniziative - a saran proponudis intune cun tocs di cronichis dal '500, cun contis popolârs e cun fruçons di aprofondiment storic. A compagnâ il public dilunc vie de serade a saran lis vôs di Raffaele Serafini, Checo Tam e Carli Pup. Cun di plui, cheste volte, la serade e sarà ancje compagnade de musiche sunade di Marco Tomasin.

Joibe a Cividât si fevele dal 1511

Joibe ai 28 di Lui a Cividât, alì di palaç Costantini (za palaç Craigher - Gabrici in vie "IX agosto"), a vot e mieze di sere (20.30), si davuelç l'apontament cun "Gotis di storie e di culture" che chest an al à par teme il 1511, sei par fevelâ dal riviel sei dal taramot che al à scjassât il Friûl ai 26 di Març di chel an. Cun di fat, il titul de manifestazion metude adun de famee Costantini, dal Circul di culture "Ivan Trinko", de Universitât de Tierce Etât e dal ERAPLE, al è "1511: l'uomo e la natura si ribellano".A dâ il lôr contribût a son po ancje la Union dal emigrants slovens / Slovenci po svetu, la SOMSI di Cividât e la Associazion 1511. Dilunc vie de serade si viodaran lis imagjins leadis ai taramots furlans, si scoltaran lis musichis di Marta Vigna, Stefano Fornasaro e dai grup dai sunadôrs di armoniche di Saint Gilles, e si sintaran i intervents storics di Carli Pup (pe Associazion 1511) e dal scritôr Franco Fornasaro moderâts di Adolfo Londero.

Une riflession su cemût ricuardâ i fats dal 1511

Sul numar di Mai dal mensîl "La Patrie dal Friûl" o cjatìn un intervent di Sandri Carrozzo su lis manieriis che in Friûl si à ricuardât i fats dal 1511. Il toc al è un di chei che si puedin za lei in integrâl sul sît internet de riviste. La riflession nus somee interessante, cussì o 'nt proponìn il prin toc achì disot e us invidìn a lei il rest sol sît de "Patrie".

"Pai cinccent agns dal 1511 e je stade cualchi contraposizion su ce proponi in prin plan tes celebrazions: tra tantis clâfs di leture, chês dôs che a àn vût plui fuarce a son stadis, di une bande, la origjin furlane de storie di Juliete e Romeu (leade ae vicende de furlane Lucine Savorgnane e dal visentin, di mari furlane, Luigi Da Porto, che a varès ispirade la opare shakespeariane), di chê altre bande, e la grande rivolte popolâr. Sot de contraposizion a son concezions e interès diferents su cemût invistî risorsis publichis: duncje e je ancje une cuistion politiche..."

Par continuâ a lei l'articul baste lâ achì.

Contecurte 1511 intal mulin di Rivis ai 16 di Jugn

Ai 16 di Jugn, a nûf mancul un cuart (20.45), alì dal mulin di Rivis di Sedean si davuelzarà "Contecurte 1511", un apontament a cjaval tra storie e leterature dedicât al riviel de Joibe Grasse. A proponi la iniziative, metude adun de Associazion 1511, de Ostarie leterarie di Contecurte e di Onde Furlane, al è il Comun di Sedean cul jutori de Pro Loco di Rivis.

Inte suaze incantesemade dal mulin di Rivis, il riviel dal 1511 al sarà il protagonist di une schirie di storiis metudis adun inte suaze dal progjet leterari di Contecurte, che a laran a miscliçâsi cun tocs di cronichis dal '500, contis popolârs e fruçons di aprofondiment storic. A dâi vôs a contis antighis e modernis a saran Raffaele Serafini, Checo Tam e Carli Pup. Un viaç indaûr inte nestre storie, judâts de atmosfere cence timp dal lûc.

Tal câs che al sedi brut timp la serade si fasarà distès, ma dentri dal mulin.

"1511 il Friûl de Joibe Grasse" a Remanzâs

Martars ai 7 di Jugn a Remanzâs, alì de ostarie "Posto di conversazione"  (in vie Marconi), a vot e mieze di sere (20.30), si varà la presentazion di "1511 il Friûl de Joibe Grasse", la publicazion de cooperative Serlingcu la mape di Luigino Peressini e i tescj di Carli Pup.

Intant de serade i doi autôrs a contaran la storie dal plui grant riviel popolâr furlan: dal cressi des tensions sociâls ae faide jenfri Strumîrs e Çamberlans, de vuere tra Vignesie e l'Imperi ai savoltaments dal Carnavâl, par rivâ po ae fin dal riviel, ma ancje ae ereditât che al à lassât ai furlans. Une gnove ocasion, duncje, par recuperâ un toc impuartant de storie dal popul furlan.

E je fûr la publicazion "Riviei di ingjustri"

"Riviei di ingjustri" al è il non de mostre che si pues viodi fin ai 11 di Jugn alì de sale esposizions dal Visionario di Udin, ma al è ancje il titul de publicazion editade di Informazione Friulana e de Associazion 1511 che e ten dentri dutis lis contis a fumuts che a àn partecipât ae edizion 2010 dal Premi Friûl dedicade ae Joibe Grasse dal 1511. Intal libri si cjatin duncje i lavôrs metûts adun di Guido Carrara, Lorenzo Manià, Nicola Angeli e Fabio Varnerin, Emilio Bertossi, Eleonora Spizzamiglio, Enrico Tomasi, e dal progjet MaMaRuTo, compagnâts di notis biografichis sui autôrs e di un pâr di pagjinutis cun cualchi informazion storiche su la insurezion popolâr furlane dal 1511.

Lis copiis di "Riviei di ingjustri" si lis cjate alì dal pont vendite dal Visionario (fintremai che e je la mostre) e alì de sede di Radio Onde Furlane a Udin. Cun di plui, a saran disponibilis ancje intant dai apontaments che la Associazion 1511 e inmanearà ator pal Friûl e che, come par solit, o cjatais lis informazions su chest blog.

Cui 28 di Mai "Riviei di ingjustri" al Visionario

Sabide ai 28 di Mai a sîs e mieze sot sere (18.30) alì de sale esposizions dal Visionario di Udin si scree "Riviei di ingjustri", la mostre des taulis origjinâls dai fumuts che a àn partecipât ae edizion 2010 dal Premi Friûl di Onde Furlane che e jere dedicade ae Joibe Grasse dal 1511. La iniziative e je inmaneade di Informazione Friulana / Radio Onde Furlane e de Associazion 1511 cul jutori dal assessorât pe culture dal Comun di Udin.

Dentri di "Riviei di ingjustri", in plui des contis a fumuts metudis adun di diviers autôrs (Guido Carrara; Lorenzo Manià; Nicola Angeli e Fabio Varnerin; Emilio Bertossi; Eleonora Spizzamiglio; Enrico Tomasi; progjet MaMaRuTo) pal Premi Friûl, si podaran viodi ancje des taulis origjinâls di Luigino Peressini, l'artist furlan che cul so "Vitis di un vilan salvadi" al è stât il prin a cubiâ fumuts e Joibe Grasse dal 1511. A compagnâ il materiâl ilustrât a saran ancje des notis storics che a permetaran di insuazâ miôr causis e davuelziment dal riviel.

La mostre e restarà vierte fin ai 11 di Jugn cui oraris de sale esposizions dal Visionario, ven a dî plui o mancul di cuatri tal dopodimisdì a nûf e mieze di sere (16.00-21.30). Inte figure si viôt un particolâr di une des taulis di Lorenzo Manià.

Joibe, vinars e sabide cunvigne su riviei e ribelisim

Inte suaze des iniziativis in program pai cinccent agns dal riviel de Joibe Grasse si varà ancje une cunvigne di trê dîs inmaneade des Universitâts dal Friûl, dal Litorâl e Ca' Foscari di Vignesie che e je stade batiade "Riviei e ribelisim tra ete di mieç e etât moderne".

L'apontament si davuelç su trê zornadis: joibe ai 12 di Mai alì dal salon dal Parlament de Patrie dal Friûl, in cjistiel a Udin (15.00 - 19.00); vinars ai 13 di Mai tal salon dal cjistiel di Colorêt di Montalban (9.30 - 13.00 / 14.30 - 18.30); e sabide ai 14 di Mai alì de sale Gusmani di palaç Antonini a Udin (9.30 - 13.00).

E je la ocasion par scoltâ passe une vincjine di esperts che a fevelaran dai riviei che a àn tocjât chest toc di Europe tra il '400 e il '500, ma ancje dai elements sociâi e culturâi che a jerin daûr des rivoltis popolârs e dai scuintris tra fazions che a àn segnât chê ete storiche. Une ocasion impuartante, duncje, par cui che si interesse di chescj argoments.

Michael Gaismair e il riviel tirolês dal 1525

O vevin prometût di tornâi parsore ae figure di Michael Gaismair, comandant militâr e ideolic de rivolte contadine tirolese dal 1525, e cumò e je rivade la ore di mantignî chê promesse. La ocasion nus rive dal articul publicât sul numar di Març dal mensîl "La Patrie dal Friûl" che cumò si pues lei par intîr ancje sul sît internet de riviste. Achì disot o proponìn duncje il prin toc dal articul e us invidìn a lei il rest sul sît de Patrie.

"Intant che in Friûl si ricuardin i 500 agns dal riviel de Joibe Grasse, si à di fevelâ dal tirolês Michael Gaismair (1490 – 1532), comandant militâr e ideolic de rivolte contadine tirolese dal 1525. Nomenât cjapitani dai contadins in riviel intal Mai dal 1525, Gaismair al clame dongje une Diete tirolese là che al domande al arciduche Ferdinant di Asburc che ducj a sedin compagns denant de leç, che a sedin eliminâts i privileçs dai nobii, il dirit di elei i judiçs e i predis. Pôc dopo vê cjatât un compromès cui rivoltôs, l’arciduche al mancje ae peraule dade: al ritire lis concessions fatis, al fâs impresonâ Gaismair e al invie la repression..."

Par continuâ a lei l'articul baste lâ achì.

"1511 il Friûl de Joibe Grasse" a Cjampfuarmit

Joibe ai 21 di Avrîl, alì de ostarie "A la Patrie dal Friûl" a Cjampfuarmit (te place là che al è ancje il palaç dal Comun), a vot e mieze di sere (20.30), si davuelzarà une gnove presentazion di "1511 il Friûl de Joibe Grasse": la publicazion de cooperative Serling che e met adun la mape creade di Luigino Peressini e i tescj scrits di Carli Pup par contâ la storie dal plui grant riviel popolâr furlan.

Inte suaze carateristiche e ospitâl de ostarie, i doi autôrs a proponaran un viaç intal Friûl dal 1511 framieç dal cressi des tensions sociâls, de faide jenfri Strumîrs e Çamberlans, de vuere tra Vignesie e l'Imperi, dai savoltaments dal Carnavâl, par rivâ po al sclop, al svilup e ae fin dal riviel, ma ancje ae ereditât che al à lassât ai furlans.

Une gnove ocasion par cognossi miôr la storie dal Friûl e par recuperâ un toc impuartant de nestre memorie di popul.

"Fûcs su lis culinis" ai 9 di Avrîl a Vildivar

Dopo de serade de setemane stade a Murùs, la Associazion 1511 e propon “Fûcs su lis culinis. Storiis di riviel tal Friûl culinâr” ancje a Vildivar. L'apontament al è sabide ai 9 di Avrîl a vot e mieze di sere (20.30) alì de sale dal Consei comunâl di Vildivar.

La iniziative - che e diven de colaborazion tra il Comun di Vildivar, la Associazion 1511, la Serling, la Associazion “El Tomât” e il grup “Vididule Project” - e propon un aprofondiment a cjaval tra storie, croniche, leterature e musiche su trê rivoltis furlanis: chê de Joibe Grasse dal 1511; chê dal 1841 a S. Denêl cuintri de privatizazion des comugnis; e chê di Sarsêt dal 1867 cuintri de “vuardie nazionâl”.

Intant de serade, i atôrs Daniela Zorzini e Daniele Copetti a proponaran la leture seniche di tocs gjavâts fûr sei di cronichis di chei agns, sei di oparis leterariis scritis di Alviero Negro e Riedo Puppo. Carli Pup invezit al proponarà la ricostruzion storiche dai trê episodis. I musiciscj dal “Vididule Project” a compagnaran leturis e intervents storics cuntun repertori di musichis tradizionâls e tocs componûts di pueste pe ocasion.